“ನಿಮ್ಮ ಮಿತ್ರನ ಕುರಿತು ನಾನು ಈಗ ತಾನೇ ಕೇಳಿದ್ದೇನು ಗೊತ್ತೇ” ಎಂದು ನಿಮ್ಮ ಪರಿಚಿತರೊಬ್ಬರು ಹೇಳಿದರೆ ನೀವೇನು ಮಾಡುವಿರಿ? ನೀವೇನು ಮಾಡುವಿರೋ ಅದನ್ನು ಸಾಕ್ರೆಟಿಸ್ ಮಾಡಿದ್ದರೊಂದಿಗೆ ತುಲನೆ ಮಾಡಿ, ನೀವು ಕಲಿಯುವಂಥದ್ದು ಇದೆಯೇ ಎಂಬುದನ್ನು ನೀವೇ ತೀರ್ಮಾನಿಸಿ.
ಸಾಕ್ರೆಟಿಸ್: “ ಒಂದು ನಿಮಿಷ ತಡೆ ಮಹಾರಾಯ. ನೀನೇನು ಹೇಳಬೇಕೆಂದುಕೊಂಡಿರುವುದನ್ನು ಹೇಳುವ ಮೊದಲು ನಾನು ಕೇಳುವ ೩ ಪ್ರಶ್ನೆಗಳಿಗೆ ಉತ್ತರ ಕೊಡು. ನಾನು ಈ ಪ್ರಶ್ನೆಗಳಿಗೆ ತ್ರಿವಳಿ ಶೋಧಕ ಪರೀಕ್ಷೆ ಎಂದು ಹೆಸರಿಟ್ಟಿದ್ದೇನೆ”
ಪರಿಚಿತ: “ತ್ರಿವಳಿ ಶೋಧಕ ಪರೀಕ್ಷೆ?”
ಸಾಕ್ರೆಟಿಸ್: “ಹೌದು. ನನ್ನ ಮಿತ್ರನ ಕುರಿತು ನನ್ನೊಂದಿಗೆ ನೀನು ಮಾತನಾಡುವ ಮುನ್ನ ನೀನು ಏನು ಹೇಳಬೆಕೆಂದಿರುವುದನ್ನು ಈ ಶೋಧಕದಲ್ಲಿ ಸೋಸುವುದು ಒಳ್ಳೆಯದು. ಮೊದಲನೆಯ ಪ್ರಶ್ನೆ- ನೀನು ಏನು ಹೇಳಬೇಕೆಂದಿರುವೆಯೋ ಅದು ನೂರಕ್ಕೆ ನೂರರಷ್ಟು ಸತ್ಯ ಎಂಬ ಖಾತರಿ ನಿನಗಿದೆಯೇ?”
ಪರಿಚಿತ: “ ಇಲ್ಲ. ಏಕೆಂದರೆ, ಅದನ್ನು ನಾನು ಈಗ ತಾನೇ ಅದನ್ನು ----“
ಸಾಕ್ರೆಟಿಸ್: “ಸರಿ ಬಿಡು. ನೀನು ಹೇಳಬೇಕೆಂದಿರುವುದು ನಿಜವೋ ಸುಳ್ಳೋ ಎಂಬುದು ನಿನಗೇ ತಿಳಿದಿಲ್ಲ. ಈಗ ಎರಡನೆಯ ಪ್ರಶ್ನೆ- ನೀನು ನನ್ನ ಮಿತ್ರನ ಕುರಿತು ಹೇಳಬೆಕೆಂದುಕೊಂಡಿರುವುದು ಏನಾದರೂ ಒಳ್ಳೆಯ ಸುದ್ದಿಯೇ?”
ಪರಿಚಿತ: “ ಇಲ್ಲ. ವಾಸ್ತವವಾಗಿ ಅದೂ----“
ಸಾಕ್ರೆಟಿಸ್: “ ಓ, ನೀನು ನನ್ನ ಮಿತ್ರನ ಬಗ್ಗೆ ಹೇಳಬೇಕೆಂದುಕೊಂಡಿರುವ ಕೆಟ್ಟ ಸುದ್ದಿ ನಿಜವೋ ಸುಳ್ಳೋ ಎಂಬುದು ನಿನಗೆ ಗೊತ್ತಿಲ್ಲ. ಪರವಾಗಿಲ್ಲ, ಈ ಮುಂದಿನ ಪ್ರಶ್ನೆಗೆ ನಿನ್ನ ಉತ್ತರ ಕೇಳಿದ ಬಳಿಕ ಆ ವಿಷಯ ನಾನು ಕೇಳಲೇ ಬೇಕಾದದ್ದೋ ಅಲ್ಲವೋ ಎಂಬುದನ್ನು ತೀರ್ಮಾನಿಸೋಣ - ನೀನು ಹೇಳಬೇಕೆಂದು ಕೊಂಡಿರುವ ವಿಷಯ ನನಗೆ ಉಪಯುಕ್ತವಾದದ್ದೇ?”
ಪರಿಚಿತ: “ ಇಲ್ಲ. ವಾಸ್ತವವಾಗಿ ಅದೂ----“
ಸಾಕ್ರೆಟಿಸ್: “ ನನ್ನ ಮಿತ್ರನ ಬಗ್ಗೆ ನೀನು ನನಗೆ ಹೇಳಬೇಕೆಂದುಕೊಂಡಿರುವುದು ನಿಜವೂ ಅಲ್ಲ, ಒಳ್ಳೆಯದೂ ಅಲ್ಲ, ನನಗೆ ಉಪಯೋಗವಾಗುವಂಥಾದ್ದೂ ಅಲ್ಲ ಅಂದ ಮೇಲೆ ಅದನ್ನು ನನಗೇಕೆ ಹೇಳಬೇಕು?”
No comments:
Post a Comment